"بطلتي توحشينى" في الليل والناس نيام، والكل في حاله سارح. مر عليَّ الكلام مسنون و حزين و جارح. الست ساعتها غنت في الراديو لسا فاكر. و النحلة النايمة طنّت لما صحيوا العساكر.  و عساكر الليل دماغي. في خناق هيجيبوا داغي. والشوق عمال يلاغي. والقلب ضعيف و ناكر. في الليل.. والناس نيام، والكل في حاله سارح. عدّى علي الكلام مسنون و حزين و جارح. الست ساعتها غنت في الراديو لسا فاكر. والنحلة النايمة طننننت لما صحيوا العساكر.  و عساكر الليل دماغي. في خناق هيجيبوا داغي. والليل عمال يلاغي. والقلب ضعيف و ناكر.  هكتب عن وصف ألمي، والا عن بعد ناسي! والا عن حب خدني، و شغلني و هو ناسي. الصبح منامه فارقه؛ خلَّاه هجر السراير. والقلب هيامه سارقه، والعقل نشيط وفاير. أنا لما كتبت شعري، و وصفت الوحشة ليكي. رخصت بنفسي سعري أملاً شعري يراضيكي. ولقيت ولا شعر نافع، ولا قلبي البيت أويكي. عمال أدفع و أدافع عن حقي الشخصي فيكي. مش عارف أقول كرهتك، مش عارف أقول ناسيكي. كملتك ألف مرة، منقصتش إلا بيكي. النور شقشق و لالى، و الحالة تجر حالة. والهم اللي في فؤادي واصل لله تعالى. هو العالم بأمري، وبفعلي ط...

قصيدة "وحشتينى3" من الكون الضخم المتقسم بحر ووديان. للقارة السمرا المليانة بأشكال والوان. لبلدنا اللي النيل في جبينها بيزرع بستان. لمكان وسط القاهرة مأهول زحمة و سكان. للبيت اللي في زاويته قاعدة أجمل واحدة بأجمل فستان. و بتملى مكان في كيان الشاب التلاتيني. بهدي لتالت مرة النص اليها. و بسيب في ايديها جواب في بدايته وحشتيني.. و لو كل اللي عارفينك قالولك إني خاب أملي.. و لو كل الظروف حالفين تفارقيني.. وحشتيني. وحشتيني. و يوحشني اللي من ريحتك، ولو ورقة. و أحب الجاي من طرفك، ولو طلقة. و أغير من أي شيء لمسك، ولو شعري. و اسامح أي شيء منك، ولو باعني. تودعني الحياة.. و متمناش في يوم صورتك تودعني. يا ورداية في جبل روحي. يا أول شمس في الدنيا. يا شيء Well Done. يا Only One. يا زوجتي الأولى و التانية. معايا حتى في غيابك. و مش شاغلاني أسبابك. شاغلني إنك لازلتي بخير. و ده معناه بإن الدنيا لسه بخير. و إن الزهر هيفتّح على أغصانه. و إن النورس الشارد هيتمتع بشطانه. و إن خيالي هيحاوطك بأحضانه و يطلق في سماكي الطير. شاغلني إنك.. لازلتي بخير. مايشغلنيش سوى انك.. تكوني كيف ما أقول عنك. وتبقى زي ...

كلمات "وحشتيني2 " غيابك طال. وبوّختي في هزار بعدك. انا بعدك عرفت اني ماليش بعدك. كبر سني.. يا أول حاجة أحوِّشها وأشوفها بتتسرق مني. ببص من الغياب على الباب، وأقول بالوقت هتحني. قعدت استني واتحوّلت لشطره ف غنوة الأطلال. غيابك طال.. خصامنا مهما كان حاصل ماكنش في بالي يقلب جد. بتطوّح، لا عارف اغيب.. ولا بشكي اللي فيا لحد. بقيت زاهد، ومش مشغول. ولا برحيل ولا بوصول. وبسكت، وامّا قلبي يقول.. يقول فينك ! ياريت كل اللي عارفينك.. قالولك اني بيكي بعيش. ياريت كل اللي عارفينني.. سابوني لشكي ويقيني. وحشتيني.. وحشتيني. رماني الشوق عليكي من يومين فايتين. فتحت رسايلك السابقة، من الآخر.. فضلت اقراها واطلع فوق. وكل ما تنتهي دمعه، تسيل أخرى. وكل ما تنتهي جملة، يهِفّ الشوق. - ما فيش داعي لكلام تاني... لقيت منك مكالمة الصبح! في حاجة؟؟ = ياريت لو شفتي رناتي تردي حتى برسالة. - مالوش لازمة الكلام ده خلاص.. دي آخر مرة أقولهالك. = ما تتكلمش. - خلاص مش طايقة مني كلام .! نقطة، علامة إستفهام.. نقط أكتر.. تعجب.. نقطة.. واستفهام. - أنا عاوزك ياريت تتصلي من فضلك. فضلت أقرا.. فضلت أرجع.. شهور وأيام.. شهور ...

قصيدة "وحشتيني 1" وحشتيني. و لو كل اللى عارفينك .. قالولك إني منفعكيش. و لو كل اللي عارفيني قالولي بكرا تنسيني. وحشتينى. ولو كل البشر قالوا إن أنا عاصي. ده ..ده واد تلفان، كل يومين معاه واحدة. حتي فلان زعل وياه علشان واحدة. أنا أصلا مانيش يوسف. ولو زوجة العزيز همت وقالت.. هيت لك يا جميل.. يجوز راح أميل. ممكن أضمها جهراً. يسيل من ضحكها نهراً. تدوب الأغنيات في النيل لكن مهما هشوف وهطوف ومهما قابلت ناس وظروف هتبقي لوحدك القشة اللي جت علشان تنجيني.. وحشتيني...وحشتينى. مافيش إنسان مالوش ماضي. مافيش راجل مالوش أخطاء. لكن دايما فيه نقطة ضعف. ونقطة ضعفي هي انتي. طول الوقت كنت بقول أنا مابقتش عايز شيئ سواكِ انتي. بحس معاكي إني مسيح. براءتك عاملة زي الريح. بتكنس في الغلط بهدوء. وببقي في ضحكتك سكران ومش عارف لا أنام و لا أفوق! كان فيه حل والله.. كان ممكن أكون بالوقت زوج صالح. ماليش في المسئولية ساعات.. ساعات طايش لكن.. بالوقت كان ممكن أكون أحسن. تسامحيني في غلط فالت. وأحلفلك بإني هصلح العدلة التي مالت. بلاش تمثيل علشان أصلا صياعتي وفشلي من غيرهم.. ماكنش يجوز تحبيني.. وحشتينى. في كل مك...

"جوابي الأخير"   جوابي ده الأخير ليكي يا معاليكي.. يا ست الحسن يا سبب الحزن، والعلة يا شجرة حسبتها ضلة وطلعت نار. مساء الخير على الأزهار، على خدودك مبنجرحش.. ومبنسمحش لحد يقول كلام عنك. لذلك.. ثُمّ أما بعد؛ أنا الطفل اللي كان ف عنيكي متشعبط يشوفك.. روحه تتلخبط وقلبه ابن الحرام يضعف ويستعبط كأنك.. زار وأنا الدرويش كأنك غار .. وأنا الحرافيش كأنك.. كنتي قرش حشيش، دخل رئتيني وملاني كأنك دار وأنا اللي مليش سوى الدار اللي لماني. بغض الجرح.. مين خان مين ومين قصر مع التاني! وغض الطرف عن اسمك، وطعم خروجه ف لساني انا مليت من القِصة... ومن لعبة خلاص لسه لقيتك غيمة ف حياتي، حسبتك مطرة قومت جريت وفجأة لقيت مفيش غير ليل سحابة ضلمة كنتِ انتي أشوفك ف الوجع بنتي وأحسك أرضي وسفينتي وشمس بتملى ليلي شروق مفيش كام يوم.. لقيتني بفوق وأشوف القاتل الفعلي لقيتك أرض متضمش سوى المطاريد وأنا عيل.. بيفتح إيد يشوف خطك على كَفه عنيا عيال إذا بصيتي، يتدفوا حسبتك أُم بتدور رَحى الأحضان على عيالها لقيتك، ماسكة كاتم صوت رصاصك فات وجع جواي وهو يا حلوة يعني الموت، بيفرق شكله، كان ازاي. وهو الجرح للستات ومش ل...