كلمات قصيدة "وحشتيني 2" عمرو حسن

كلمات "وحشتيني2 "

غيابك طال.

وبوّختي في هزار بعدك.

انا بعدك عرفت اني ماليش بعدك.

كبر سني..

يا أول حاجة أحوِّشها وأشوفها بتتسرق مني.

ببص من الغياب على الباب، وأقول بالوقت هتحني.

قعدت استني واتحوّلت لشطره ف غنوة الأطلال.

غيابك طال..

خصامنا مهما كان حاصل ماكنش في بالي يقلب جد.

بتطوّح، لا عارف اغيب.. ولا بشكي اللي فيا لحد.

بقيت زاهد، ومش مشغول.

ولا برحيل ولا بوصول.

وبسكت، وامّا قلبي يقول..

يقول فينك !

ياريت كل اللي عارفينك.. قالولك اني بيكي بعيش.

ياريت كل اللي عارفينني.. سابوني لشكي ويقيني.

وحشتيني.. وحشتيني.

رماني الشوق عليكي من يومين فايتين.

فتحت رسايلك السابقة، من الآخر..

فضلت اقراها واطلع فوق.

وكل ما تنتهي دمعه، تسيل أخرى.

وكل ما تنتهي جملة، يهِفّ الشوق.

- ما فيش داعي لكلام تاني... لقيت منك مكالمة الصبح! في حاجة؟؟

= ياريت لو شفتي رناتي تردي حتى برسالة.

- مالوش لازمة الكلام ده خلاص.. دي آخر مرة أقولهالك.

= ما تتكلمش.

- خلاص مش طايقة مني كلام .!

نقطة، علامة إستفهام.. نقط أكتر.. تعجب.. نقطة.. واستفهام.

- أنا عاوزك ياريت تتصلي من فضلك.

فضلت أقرا.. فضلت أرجع.. شهور وأيام.. شهور وأيام.

كلام متقال كأنه النار في كومة قش.

رصاص طالع من الشاشة لقلبي الهش.

رجعت أكتر .. فضلت أرجع.

وفجأة.. لقيت كلام أجمل! كلام أجمل!

ورود ووعود .. كلام في الحب وسنينه.

جُمل من أغنيات الست.

فضلت أقرا.. وكل ما أقلب التفاصيل، تزيد سنوات على سنيني.

رسالة توّدي لرسالة.

أهو رجعتي تحبيني.

فضلت أرجع.. كذا فلاش باك.

وكل ما أراجع الأيام.. تروّح دمعتي لعيني.

فضلت أرجع.. لحد ما روحت للآخر.

وفي الآخر..

لقيت أول وحشتيني.

وحشتيني.

بحطة إيدك الناعمة أنا ما زلت.

و وزني زي ما هو لكنّي تقلت.

وبمشي لحد ما بنسى بإني وصلت.

طباعي ثابته ماختلفتش.

برَّبي كلاب.. بسيب واتساب.

دوا المعدة تلات مرات، بفوِّت مرتين منهم.

وكالعادة فيه كام موضوع بيرفض عقلي يحسمهم.

ورقمي زي ما هو.

وبرايا نقيض جوه!

بفتكرك إذا بصيت بالليل من الشباك، وأقول هتفوت.

ياخدني بعدها سرحان .. يرد سكوت.

حبيبك كل يوم بيموت.

لكن واقف على رجليه.

وضِحكُه مع الصحاب طالع.

لكن برضه في شيء في عينيه.

لا بد الشيء ده يبقى سؤال..

رفضتي عليه تجاوبيني.

وحشتيني عشر مرات وأنا بكتب وحشتيني.

وحشتيني..

ولو كان الزمن بقى غير.. خمس سنوات.

وحشتيني.

ولو حتى الظروف صادّه.

وحشتيني في رجوع الطير لعش اتهد من مدة.

بقيتي.. نشيدي وحكايتي ،وصمتي وصوتي ومرايتي

بقيتي نهايتي وبدايتي .. ومعجزتي اللي جيت بيها.

جدع زيي .. مخبي الدنيا في جيوبه.

لكن أشواقه ليكى تبان و مش عارف يخبيها.

لا عشت معاها يا قلبى.. و لا لك نبض بعديها.

بشوف نفسي في ضهر الباب.

براجع كل لوم و عتاب.

و مستني الزمن يصفى.

و برد الامنيات يدفى.

و يصفالي الزمن مرة.

و تنسي الدنيا و تجيني.

خمس سنوات وحشتيني .. وحشتينى.

لمشاهدة القصيدة على اليوتيوب اضغط هنا.

لمشاهدة قصيدة وحشتيني 1 مكتوبة اضغط هنا

لمشاهدة قصيدة وحشتيني 3 مكتوبة اضغط هنا