كلمات "امتى هنفرح فيك" للشاعر فارس قطرية Fares A.katrya

"امتى هنفرح فيك ؟"

الناس بتحب و تتجوز و انت يا غلبان .. 

عشمان ترتاح لو يوم واحد من دي الأحزان 

و بقالك عمر بتستعبط و مقضي حياتك شغل و نوم ..

لا بتسهر و لا بتروح تشحن و لا عمرك جيت على بال إنسان 

الناس كلها اتنين اتنين .. 

و انت المتونس مع حالك 

كباية الشاي المظبوطة برقبة الحب و أحلالك 

متعود تسهر بس وحيد ..

تسمع أفلام أو مزيكا و يا بيبي بتتقال لاصحابك أما انت محدش قالهالك.

خايف لا تحب..

و تتعلق تاخد على عينك من تاني 

بتقول علي الحب جميل و عظيم، بس انت بترتاح وحداني 

تنصح في الناس.. 

و تقول حبوا و ادخلوا علاقات و اعملوا صداقات.. 

و انت لا بتحب و لا مصاحب اخرك تتفرج و تعاني.

بس انت تبعنا احنا الرايقين 

احنا اللي ارتاحنا من الدوشة و من البني أدمين 

بننام وقت اما نحب ننام..

و نقوم بمزاح و هدوء و سلام..

بنزود غني و نقل كلام.. 

و نعيش اليوم باليوم راضيين.

أصلها أرزاق..

فيه ناس تتحب..

و ناس مخلوقة تكون معازيم 

تحضر أفراح.. 

تاكل جاتوهات و تسقف و كأنها قرد يتيم  

الناس كلها تصحى من النوم علي صوت اللي تحبه و احنا.. 

نصحي من النوم على صوت بيقول حمرة يا أوطة العشرة بمليم 

و النبي حلوين

و قلوبنا تمام بس نعمل ايه بختنا مايل 

الحظ ملوش عندنا حاجة و مشيلناش أي جمايل 

لينا مع الحب سوابق موت كلها ممضية من الأحزان.. 

و الصحة ماتستحملش كمان يغلطوا و نروح احنا نحايل 

قوانين الحب بتاعة الناس...

مابنفهمهاش 

الكلمة الحلوة اللى تونس في الوحدة الصعبة منسمعهاش

الواحد اتعود يمشي.. 

و اديه ماسكة اديه التانية..

مستني الحظ يعدي عليه زي الباقيين، بس معداش

بننام بدري.. 

و نصحي المغرب ،و بنعرف نعمل شاي مظبوط 

و تشوفنا الناس و يقولوا حديد ،و قلوبنا دي أضعف من البسكوت 

بنحب أغاني الحب برغم اننا ملناش أحباب خالص..

وبندعي لكل الناس تتحب ،و تحب بجد ،و تبني بيوت.

احنا العزال .. 

بين الأحباب و الناس الرخمة اللي تقاطع 

احنا اللي في كل مكان بنكون قاعدين زي القرد القاطع 

ناكل أو نشرب أو نلعب و الباقي يسَبْل و يغازل

و احنا في الطالع و النازل نضحك و نبص 

عاوزين نتحب و مش قادرين ، فبنفضل في الحكايات في النص

 

طب إيه..

مش ناوي تشوف حالك !

تختار مع واحدة إسم عيالك..

مش لايقة عليك تخلص صالونات و أمك تختار و تجيبهالك 

مش هانت بقا و هنفرح بيك ،وتجيلنا أخيراً مع إنسان..

ينفع يصطادك من الأحزان ،و تدوق الفرحة اللي في بالك.. 

و اللى انت يا واد شكلك منهم ، و الحب حرام علي أمثالك.

هو احنا لقينا اللي يقدر ومكملناش وياه يولاه ! 

قلبنا متشال بالكيس لونيس بس يقدره ويحب لقاه ..

في كلام ودلادل ودلع متشال تحويشة عمر وحب كبير ..

وهيطلع ف الوقت المظبوط للشخص الصح اللي هنلقاه 

و لحد ما نلقاه هنقولك .. 

يتعافي المرء بأكلة تمام أو شاي مظبوط مش بحبيبه ..

عمرك ما تشوف كبابة شاي و حبيبها معاها و بتسيبه 

من يوم ما اخترعوا الحب زمان ،و الناس عمالة تموت بعض

القلب بيفضل زي الفل لحد اما الحب يصيبه 

القلب بيفضل زي الفل لحد اما الحب يصيبه .. و عجبي 

للمشاهدة على اليوتيوب اضغط هنا