كلمات قصيدة "وحشتيني 1" للشاعر عمرو حسن

قصيدة "وحشتيني 1"

وحشتيني.

و لو كل اللى عارفينك .. قالولك إني منفعكيش.

و لو كل اللي عارفيني قالولي بكرا تنسيني.

وحشتينى.

ولو كل البشر قالوا إن أنا عاصي.

ده ..ده واد تلفان، كل يومين معاه واحدة.

حتي فلان زعل وياه علشان واحدة.

أنا أصلا مانيش يوسف.

ولو زوجة العزيز همت وقالت..

هيت لك يا جميل..

يجوز راح أميل.

ممكن أضمها جهراً.

يسيل من ضحكها نهراً.

تدوب الأغنيات في النيل لكن مهما هشوف وهطوف ومهما قابلت ناس وظروف هتبقي لوحدك القشة اللي جت علشان تنجيني.. وحشتيني...وحشتينى.

مافيش إنسان مالوش ماضي.

مافيش راجل مالوش أخطاء.

لكن دايما فيه نقطة ضعف.

ونقطة ضعفي هي انتي.

طول الوقت كنت بقول أنا مابقتش عايز شيئ سواكِ انتي.

بحس معاكي إني مسيح.

براءتك عاملة زي الريح.

بتكنس في الغلط بهدوء.

وببقي في ضحكتك سكران ومش عارف لا أنام و لا أفوق!

كان فيه حل والله..

كان ممكن أكون بالوقت زوج صالح.

ماليش في المسئولية ساعات..

ساعات طايش لكن.. بالوقت كان ممكن أكون أحسن.

تسامحيني في غلط فالت.

وأحلفلك بإني هصلح العدلة التي مالت.

بلاش تمثيل علشان أصلا صياعتي وفشلي من غيرهم..

ماكنش يجوز تحبيني.. وحشتينى.

في كل مكان.. 

في كل مكان فيه ذكرى معاكي متسابة.

إديا في إيدك الطفلة بعدي معاكي من الشارع.

ملامحك.. وانتي بتسمعي فيروز.

نهارك.. وانتي بتواجهيه بشاي بحليب.

حكاياتك على أصحابك.. فلانة بتكرهك جدا.

فلانة قالتلى متشوفيهوش، كلام قولتيه وكان لازم في وقت الجرح ماتقوليهوش.

أكيد دلوقتي بتقولي.. زمانه مولع الدنيا. 

بيغلط كل يوم عادي.. خلاص فاكك بقا، ومرتاح.

و أنا والله.. في قيودك كطير من كل ما اتقيد طلع له جناح.

أنا.. أنا ف البعد متحاوط بطيف ريحتك.

ولسه لحد هذا الوقت فاكر شكل تسريحتك.

وتنهيدك.. وشكل الساعة على ايدك.

طريقتك وانتى بتغنى.. 

بعيد عنك حياتى عذاب.

حياتك إيه بعيد عنى.

يا أرض عرفتها فجأة.

ودنيا لمستها بشويش.

يا أطهر من رقم فلكي.

ف عداد اسمه أكل العيش.

بتحكمى ليه على غيابى..

وفي حضورى بتنسينى.

رفضتى إن انتى تتسابى.

وفجأة انتى اللى سيبتينى.

وحشتيني.

كإنك.. كإنك في الغياب أقرب.

وجود بيزيد إذا بعدتي.

رصيد ناقص في كل غياب. 

و وحدك في الغياب زدتي.

عرفتي إزاي تشاركيني غنى التفاصيل.

بقيت متساب لكن شبطان.

شيطان طيفك ملاك في شيطان.

مخليني في وسط الناس لكن وحدي.

أشوف العمر بيعدي.

وحاسدني البشر على إيه وأنا بدونك!

وإيه الدنيا سوي عيونك!

سوي حضنك في وقت الخوف.

ياعم الحاسد الطامع..

تعالي و شوف..

طلل راجل.

في عز الليل.. بيسرد قصته لروحه.

ويشكي جروحه لجروحه.

ويظهر للبشر باسم، يعيش وكإنه مطمن، وهو في قلبه يتم عجيب.

شوفيلك حل في غيابك.

يا إما رجوع من المبدأ.

يا إما تقولي كيف أبدأ؟

في أى طريق ينسينى.

وحشتيني.. وحشتيني.

 وحشتينى..

لمشاهدة القصيدة علي اليوتيوب اضغط هنا

لمشاهدة قصيدة وحشتينى 2 مكتوبة اضغط هنا

لمشاهدة قصيدة وحشتيني 3 مكتوبة اضغط هنا