قصيدة "وحشتيني 3" بالكلمات للشاعر عمرو حسن

قصيدة "وحشتينى3"

من الكون الضخم المتقسم بحر ووديان.
للقارة السمرا المليانة بأشكال والوان.
لبلدنا اللي النيل في جبينها بيزرع بستان.
لمكان وسط القاهرة مأهول زحمة و سكان.
للبيت اللي في زاويته قاعدة أجمل واحدة بأجمل فستان.
و بتملى مكان في كيان الشاب التلاتيني.
بهدي لتالت مرة النص اليها.
و بسيب في ايديها جواب في بدايته وحشتيني..

و لو كل اللي عارفينك قالولك إني خاب أملي..
و لو كل الظروف حالفين تفارقيني.. وحشتيني.

وحشتيني.
و يوحشني اللي من ريحتك، ولو ورقة.
و أحب الجاي من طرفك، ولو طلقة.
و أغير من أي شيء لمسك، ولو شعري.
و اسامح أي شيء منك، ولو باعني.
تودعني الحياة..
و متمناش في يوم صورتك تودعني.
يا ورداية في جبل روحي.
يا أول شمس في الدنيا.
يا شيء Well Done.
يا Only One.
يا زوجتي الأولى و التانية.
معايا حتى في غيابك.
و مش شاغلاني أسبابك.
شاغلني إنك لازلتي بخير.
و ده معناه بإن الدنيا لسه بخير.
و إن الزهر هيفتّح على أغصانه.
و إن النورس الشارد هيتمتع بشطانه.
و إن خيالي هيحاوطك بأحضانه

و يطلق في سماكي الطير.

شاغلني إنك.. لازلتي بخير.

مايشغلنيش سوى انك..
تكوني كيف ما أقول عنك.
وتبقى زي ما ارضالك.
و تديني الحياة فرصة أسدد بعض أفضالك.
و لو كان فضلك الأكبر.. بإنك يوم قابلتيني. 
وحشتيني..
وتفضل فيا ذكراكي نسيم عابر.
يا أجمل حاجة في الأشعار.
و أجمل حاجة في الشاعر.
يا ست الجهر والأسرار.
يا ناعمة والطريق واعر.
بحبك مهما طال البُعد.
و قلبي.. عند نفس الوعد.
و حتى الفعل من غيرك بنعمله.. مع بعض.
لا عمري نسيت تاريخ بيننا..
ولا ريحة، ولا ذكرى.
بنام اليوم و كلي طموح بإني هلمحك بكره.
بتمحي غيابي بوجودك وإيدك تحضن الاُكره.
بقول لو حتى فات العمر وصرت مُسِّن في السبعين.
تساعني نظرتين عواجيز.
و تكفي ضحكتين شايبين.
و نسمع حاجة من فيروز.
تاخدنا ليوم ماشوفتيني.
وحشتيني و لو عايروني بغرامي، وقالوا عليا عايش وهم.
هكون الإيد اذا كيوبيد بيطلق في اتجاهك سهم.

و لو عايروني بغرامي.. لو قالوا ياعيني حرام.
عشقها الواد وتاه فيها.
هتبقي غصب عن عينهم.. حياتي وأغلى معانيها.
و لو قالوا دي ساحراله، وعملاله عمل بالشوك.
و لو قالوا إن أنا اتجنيت.. بقسوة أو بصنعة و ذوق.
فلو ده سحر أنا قابل.
و لو ده جنان أنا قابل.
و لو حُبِك أثر خمرة ماحبش أفوق.
و أه انتي نقط ضعفي.
و أه حابك على عيوبك.
و أه ضِلك.
و أه قلبي اللي فاضل لك.
و أه دايماً بطبلك.
و أه بإشارة محسوبك كلامهم عندي مش فارق.
و مش هافقد أمل في رجوع.
مافيش مواضيع أقولها لك.
غير إنك وحدك الموضوع.
و إن حياتي ناقصاكي.
و قلبي.. سابني و معاكي.
و إن عنيا شايفاكي.. في أول كرسي في يميني.
بتدي ضحكة للدرويش عشان يلقي.. وحشتيني فلو كل اللي عارفينك قالولك إني مانفعكيش و لو كل اللي عارفينني قالولي بكره تنسيني.
وحشتيني.

لمشاهدة القصيدة علي اليوتيوب اضغط هنا.

لمشاهدة قصيدة وحشتيني 1 مكتوبة من هنا.

لمشاهدة قصيدة وحشتينى 2 مكتوبة من هنا.