كلمات قصيدة "جوابي الأخير" من حفل عمرو حسن في ساقية الصاوي

"جوابي الأخير" 

جوابي ده الأخير ليكي
يا معاليكي..
يا ست الحسن
يا سبب الحزن، والعلة

يا شجرة حسبتها ضلة وطلعت نار.
مساء الخير على الأزهار، على خدودك
مبنجرحش.. ومبنسمحش لحد يقول كلام عنك.
لذلك.. ثُمّ أما بعد؛
أنا الطفل اللي كان ف عنيكي متشعبط
يشوفك.. روحه تتلخبط
وقلبه ابن الحرام يضعف ويستعبط
كأنك.. زار وأنا الدرويش
كأنك غار .. وأنا الحرافيش
كأنك.. كنتي قرش حشيش، دخل رئتيني وملاني
كأنك دار وأنا اللي مليش سوى الدار اللي لماني.
بغض الجرح.. مين خان مين
ومين قصر مع التاني!
وغض الطرف عن اسمك، وطعم خروجه ف لساني
انا مليت من القِصة...
ومن لعبة خلاص لسه

لقيتك غيمة ف حياتي، حسبتك مطرة قومت جريت
وفجأة لقيت مفيش غير ليل
سحابة ضلمة كنتِ انتي
أشوفك ف الوجع بنتي
وأحسك أرضي وسفينتي
وشمس بتملى ليلي شروق
مفيش كام يوم.. لقيتني بفوق
وأشوف القاتل الفعلي
لقيتك أرض متضمش سوى المطاريد
وأنا عيل.. بيفتح إيد
يشوف خطك على كَفه
عنيا عيال إذا بصيتي، يتدفوا
حسبتك أُم بتدور رَحى الأحضان على عيالها
لقيتك، ماسكة كاتم صوت
رصاصك فات وجع جواي
وهو يا حلوة يعني الموت، بيفرق شكله، كان ازاي.
وهو الجرح للستات ومش لينا!
ما فيه رجالة بتعيط..
وفيه رجالة بتفكر في عِز الليل في ناس باعوا..

وفيه راجل إذا فات في المحيط وجعه ما بيساعه
وفيه بكرا بيتشخبط

وفيه عناوين بتتلخبط
وفيه أطفال ما يتدولدوش في مستقبل مجاش قدام
وفيه زفة ما بتقومش
وفيه فرحة ما بتدومش
وفيه نغزة ف صميم الروح
مادام ف القصة فيه دابح..
أكيد ف القصة فيه مدبوح
ولو كان القتيل راجل..
ف دمه بيبقى مش بالسهل.
خسرتي معاه وجود الأهل
خسرتي الحضن واللمة
خسرتي الضهر والضمة
وبكرة هتندمي لما..
تحسي البرد من دونه
ياريتك شوفتي في عيونه حنان الأب
انا الشخص اللي كله عيوب لكن مليان حاجات تتحب..

عملت حجات.. لأول مرة بعملها 

و كملت أغنيات بيكي.. لأول مرة أكملها 

أشمك ريحة و أنا ماشي، وأقول ماشي

وأكلم ربنا عنك وجع وهروب.

عكست المشهد المكتوب

ماكنش الفيلم دي نهايته

كدا الكاتب لعب في النص 

وفيه لصق في حياتي و قص

وفيه تركيب لناس تانية

وفيه مشهد خارجي مش محطوط.

أنا و انتي..

ومطرة بتغسل الشارع من الأحزان

حضنتيني زمان و مكان 

و قولتيلى.. مفيش غيرك

نزلت في لحظة.. على ركبي

وأنا في إديا كام وردة

ضحكتيلي.. وطبطبتيلي علي خدي 

كإنك كنتي بتعدي 

على قلبي بروح حافية

مسكت الدمعة من عيني؛ بالعافية

و ضميتك في عز البرد 

لقيتني الفيلم بالكامل مفيش ولا لقطة ماسك ورد

طلع فيه حجات بتتصور و تتقصص من المونتاج

و أول ما المطر لمسك.. لقيتك دوبتي في المكياج 

عروسة حلاوة.. أو صورة 

ملامح فاظة مكسورة

في آخر جزء في الذكرى 

خسارة تكملي بكرا.

يا نور ساطع بيعمي العين مابينورش 

أنا هفضل كدا عيل ،ومابيكبرش

و بكرا يجوز تقابليني في أى مكان 

هشوفك وقتها دخان

بقوة ست هعشقها في زمان تاني 

و لمس الطفل يشبهني، ميشبهكيش

أنا جوايا كان ميت، وحابب أعيش

لا هتحول 

و لا هرجع من الأول 

و لا هكتب علشانك شعر 

هبيعك.. دون نظر للسعر

مكانك وردة ماسقيتهاش

ف دبلت من خريف موجوع

دموعي رصيد بحوش فيه لناس مستاهلة مني دموع

و حلمي معاكي من الأول.. خطيئة لابد أكفرها

رميتك طفل ببرائته ندم على حاجة و كسرها.

يا أوحش حلو كان فيا 

يا أطيب شر في النية 

كسبت حجات.. تسيء ليا، وجه الوقت إن أنا أخسرها 

كسبت حجات تسيء ليا، وجه الوقت إن أنا أخسرها.

اضغط هنا لمشاهدة القصيدة علي اليوتيوب.