كلمات قصيدة "إن بعدهن عظيم2" للشاعر فارس قطرية
قصيدة "إن بعدهن عظيم2"
.jpg)
كتبتله هي بإيد بتنزف حزن بيّن.
أنت ليه عمرك معايا ما كنت طيب، أو حنين.
ليه بخيل حتى في مشاعرك، و الخصام في عنيك فجور.
ليه اللى بينا عليا غالي، و كان عليك نسيانه هيّن.
مستحملاك.. على قد مانت كنت عصبي و مش مثالي.
و كنت أقول يا بنت عدّي، المهم يكون حلالي.
كان غيابك صعب فعلا، بس أسهل من وجودك.
كان قاتلني برود ردودك، حتى غلطك صوته عالي.
حاسس إنك سِيد زمانك، و إن حبك ليا منة.
كنت تنقص من مقامك كل يوم بالفعل سنة.
مرة غايب، مرة خايب، مرة مش عايز مناهدة.
كنت أجاهد لجل أحافظ، و أنت بتهد اللي بينا.
الغريب إنك مصدق إني لما مشيت ظلمتك.
كنت بتهيني بكلامك، و افضل أسكت، و احترمتك.
جيت عليا كتير، و غلطي إني كنت أصبر، و أعدي.
إديت كرامتي 200 قلم، و زعلت لما أذيت كرامتك.
الست لما تحب واحد.. تبقى أهله إن كان يتيم.
تبقى شايفاه كل حاجة، و إنه حتة من النعيم.
توهبه لأيام خفاف، و تكون أمانه إن مرة خاف.
و تلفه زي مايكون لحاف، و كأنه شيئ نادر عظيم.
الست لما تحب راجل.. تخلق المكسور سليم.
تقتلنا كلمة بسيطة في حوار من هزار.
بس برضه نتصالح بوردة و كلمتين.
أطفال بتعشق كل من يضحكلها.
و تكره قلوب غاويين يبكوا العين.
الست لو ميزتها؛ فملكتها.
الست لو أهملتها.. أكبر أذية.
اقتلها عادي، وسيبها عادي، ادبحها عادي.
بس متشوفهاش عادية.
تعرف إيه عن واحدة عاشت تحلم إنك تبقى بيتها؟
إدتك أوقات و حب زعلت فانت قوام رميتها.
مش هتلقى حاجات كتيرة بعدي حد هيديهالك.
و آدي طوبتك أهو ياسيدي.
كانت في إيدي، خلاص رميتها.
جايز أنا عيطت ياما، بس دمعي في حق ذاتي.
إني دخلتك في قلبي، و أنت أصغر من حياتي.
كنت أقول للناس و لأمي أنت أعظم إنجازاتي.
و انت فعلاً كنت أعظم.
بس أعظم خيبة أخيبها.
كنت ماسكة النار و راضية.
بس جت من الله و هسيبها.
في الختام أنا عاوزة أقولك..
و الا أقولك مش هقول.
بكرا تعرف انت إيه، و خسرت إيه يابن الأصول.
بكرا تاخد حد شكلك ييجي ياكلك زي فعلك.
و اللي تاخده القرعة سهل، مش هتاخده أم الشعور.
لف بعدي، و حب بعدي، و إن لقيت زيي ابقى تَبِّت.
ربنا ما يوريك يا حلو انت القساوة في واحدة حبت.
كنت بزرع أرض بور، بس برضه زرعت ورد.
و انت زارع شوك و قسوة و زرع إيدك أهو منبت.
خد بلوك.
و شربت كباية الشاي بلبن بتاعتها تاني، و سمعت المسلسل التركي، و دخلت نامت.
و عجبي.
لمشاهدة القصيدة علي اليوتيوب اضغط هنا.
لمشاهدة قصيدة إن بعدهن عظيم 1اضغط هنا.
.jpeg)
تعليقات
إرسال تعليق
اترك تعليقك هنا