كلمات قصيدة "إن بعدهن عظيم1" لفارس قطرية
قصيدة "إن بعدهن عظيم1"
رد عليها بعد خمس أيام كدا زن.
في الموبايل لما زهق مخلاص خلصت.. و هتعديني بالأيام.
و تستاهلي أكيد أحسن، و هتلاقي اللي يستاهلك.
محبتكيش.. محستكيش..
و لا انتي شكل تفكيري، و لا تفكيري كان شكلك.
زمان قولت إني حبيتك، و لو قربتي مش هاكلك.
و عدى الوقت خلاني أحسك تاني شيئ عادي.
يجوز تتشافي حد لطيف، لكن مش أم لأولادي.
و مش عيبك، و لا غلطك.. لكن قفلت و ملهاش حل.
هترضي تعيشي مع واحد بقلب و قلبه منك مل!
و حتى لو انتى قابلاها، و هتعديها علشاني.
فأنا عمري ما هقبلها، و أعيش مع واحدة ليه بتتذل!
مجربتك، و قربتك، و دربتك على طباعي.
لقيتك سهلة مش ناشفة، و عملتك دبلة في صباعي.
و إحنا يا حلوة نتكيف من اللي نتوه منوصلهاش.
حجات منروحلهاش جملة، لو اشتريناها قطاعي.
ساعتها عينيها عاندتها، و كتمتها، و صوتها إتهز.
قالتله إن كان فيه بينا وصال، و باقية على اللي كان بينا..
فآخر حاجة في وصالي، كلامك ده، كسرهالي.
يجوز كان ممكن أبقى عليك، و زعلي يطول شوية وقت.
يجوز كان ممكن اشتاقلك، و أشوف الحلو، و أنت أسأت.
لو أنت كدبت في كلامك، و أنا من حبي فيك صدقت.
فصدقني أنت شيئ خلصان، و أنا من اللحظة دي نسيتك.
لو أنت شوفتني سهلة ، و متاحة، و منفعكش حياه.
فواحد برضه يشبهلك محبش عمري يبقى معاه.
من جاور الرخيص يرخص، و حتى إن سعره كان غالي.
مش أنت البيت، و لا الفرحة، و لا الجاي اللى بستناه.
طلعت عبيطة كالعادة، و عارفة عيوبي و مشاكلي.
بتعلق بسرعة بناس لا هما طباعي، و لا شكلي.
بسامح قد ما بقدر علشان اما امشي مستناش.
و عقلي كل ما بسامحك يقولي بلاش؛ هتتاكلي.
و أجازف تاني بشعوري، و برمي الظهر، و استنى.
و أقول نارك مسيرها تروح، و أشوف من بعدها الجنة.
و اتاري الطبع فيك غلاب، و مهما عملت طبع كلاب.
وحكمة ربك إن توجع لكنها خير، بتاخد شر ناس عنا.
و مش هحكي في كلام عدى، و أقولك إني مظلومة.
و إني مهما كنت أديك.. بنفخ قربة مخرومة.
ما بين الكلمة و الأفعال سنين أنا بينها مقسومة.
و ادينى طلعت أهو ظالماك.
فلو يعنى هتمشي بلاش تسيب أعذار و جرح وراك.
خلاص عادي..
لُقانا نصيب، و لو مكملش برضه نصيب.
محدش مات بجرح حبيب، و لا انت في قصتي الجارح.
اقولك حاجة هتريح! يا سيدي عرفتك امبارح.
و لا اتعلقت، و لا نيلة.
و بينا رهان على اللي يحن، يبقى أهبل ضعيف حيلة.
قولت أنا عمري ما هسيبك، لكنك يومها محلفتش.
قولت أنا ليكي هبقى حياة، و ضهر و بيت، و معرفتش.
قولت أنا أبوكي، و أنا بنتك، و دلوقتي مخلفتش!
و جاي تعيب؛ خلاص شيلتك و لميتك و حطيتك مع الكراكيب.
يجوز إن كنت يوم هزعل، يكون على قلبي اللي إتهان.
و إني لما ماتصانتش، استنيت دقيقة كمان.
فاكرني يعني هتشحتف و اعيط يوم عليك انت!
دانا الكحل اللى في عنيا يجيب سعرك، و حبة كمان.
و قفلت السكة في وشه، و دخلت عملت كباية شاي بلبن حلوة كدا، و كملت المسلسل، و نامت.
و عجبي..
لمشاهدة القصيدة علي اليوتيوب اضغط هنا.
لمشاهدة قصيدة إن بعدهن عظيم2 اضغط هنا.
.jpeg)
تعليقات
إرسال تعليق
اترك تعليقك هنا