قصيدة "مليش ضهر " بقلم الشاعر إسلام محمد الصغير
قصيدة " مليش ضهر "
بيسألني صحبي متغير ليه
بيقولي بتشتكي من ايه
رديت بكل هدوء عليه
عاوز تعرف مالي
وإيه شاغل بالي
فعلاً جاي احكيلك
اسمعني أنا هشتكيلك
قالي: خير يا صحبي مالك
مش عاجبني خالص حالك
سارح دايما ف خيالك
احكيلي ايه شاغل بالك
كل الحكاية إن الرواية من البداية موصفتنيش
رغم تعبي وألمي وجراحي وندمي منصفتنيش
الصديق جه عليا
والحبيب غدر بيا
حتى أهلي مطمنونيش
كل الحكاية إني بتعامل بطيبة
وإني إنسان متساهل بالزيادة
في زمن وحياة عصيبة
النقي فيها بيتقيد بالبيادة
صحبي اللي أنا وثقته
لغاني خالص من وقته
نسي ما بينا من أيام
نسي تخفيفنا عن بعض الآلام
و وقوفنا مع بعض ف الشدة
نسي كل ذكرياتنا والأحلام
حياتي كانت ملك اديه
مستحملتش دمعة في عنيه
بفكر في اليوم ألف مرة
ازاى أنا هنت عليه!!
والبنت اللي أنا حبيتها
شفيت جراحها ودويتها
مستحملتش أشوف دمعتها
خبيتها في قلبي واحتويتها
تعرفوا عملت إيه؟!
حبت واحد تاني
متعرفش إنه أناني
شافته جنة وفلوسه نهر
عجبتها العربية وتسريحة الشعر
عجبتها السلسلة في الرقبة
وغيبابه عنها فوق الشهر
كانت عارفة إنه بيخدعها
حكتلي كتير إنه جرحها
كان شايف دموعها وطنشها
استغني خلاص عن خدماتها
قولتلها كتير إني بحبك
حتى اسألي قلبي وقلبك
كوني معايا طول العمر
هقدملك حبي وهفضل جنبك
قالتلي بحبك صدقني
سمعت كلامك وجوايا حاجات
مش هقدر اقولهالك دلوقتي
بس الأفضل نبقى إخوات
المشكلة الأكبر هي أهلي
متأكدين دايما من جهلي
في عز حروبي مدعمونيش
في وقت خوفي مطمنونيش
شافوا عملي بدون قيمة
ولما احتجت ليهم مساندونيش
التحطيم من أقرب ما ليا
اللى مفروض ياخدوا بإيديا
ويفضلوا جنبي ومعايا
ويقفوا ضد اللي عليا
عرفت يا صحبي مالي؟
و إيه الل شاغل بالي؟
مشكلتي إني حاسس بقهر
والأصعب إني مليش ضهر.
#إسلام_محمد
.jpeg)
جميل
ردحذف