كلمات قصيدة اللي ميعرفش عيون ليلى للشاعر فارس قطرية

قصيدة "اللي ميعرفش عيون ليلى"

اللي ميعرفش عيون ليلى.
يجهل أنا ليه حبيت ليلى.
يجهل ازاى راجل ليه كيان.
 يقلب غلبان قدام ليلى.
ميحسش نارك بنت الإيه.

غير اللى اتكوى و مسكتي إديه.

لكن بين صبح و بين ليلة، مشيت ليلى. 
علي عهد ما بين قلبى و قلبك.
سبتيني مسبتيش.. مش موضوع.
من امتا الحب بيدي ضمان و يريح حد إن كان موجوع! 
عبتيني بكل صفات إبليس.
 قولتي إني مريض و عبيط و خبيث.
و الماسك إيدي هيبقى تعيس.

و السكة معايا آخرها دموع.
عادي يا ليلى. 
سكينة عينيكي و لا تراعي.
عيل غلبان، و لا طفل لطيف. 
و عنيكي اللى استحلت تدبح.

تعمل عملتها خفيف في خفيف .
أنا لافف قبلك خلق كتير.

و عنيا عصير، كوكتيل، ستات.
و اللى مشفتوش عمري في واحدة.

إنها تدبح و تداوي نزيف! 
طب لما قتلتيني يا حلوة.

ليه مقطعتيش زوري كويس!
سميتي عليا، و وديتي جسمي المبتور حد القبلة. 
كان لسا لسانى بيتشاهد و بشاهد إيدك و الدبلة.
تمتمتي كلام عن إني جميل و العيب في نصيبك و نصيبي.
و سحبتي إديكي بسرعة علشان تخلص على طول. 
و مموتش من نصل فراقك بس من وقتها عايش مسطول. 

خلينا نقول إني الخايب.

الماسك في هواكي الدايب. 
اللى خدعتيه في غشك فى اللعب.

و روحتي عليه و قولتيله اختار.
و علشان ميخَّسركيش الواد.

قام ضحى الواد شد الشايب. 
و لا كان على البال، و لا على الخاطر.

هيجيلك يوم تكسري خاطر.
وتشوفي خسارته علشانك ضعف.

وتمشي علشان مبقاش شاطر.
العيب.. مش إنك تدي وعود من غير أسباب، و بدون نية. 
العيب.. إنك تمشي بقلبك، و مزال جسمك جنبي و حاضر. 
الله الشاهد إن أنا بديتك عن أشياء أجمل بكتير.
وعملت حجات لو مع غيرك عمرها ما تصير.
شوفتينى مجرد وقت لطيف، و حسبته مصير.

وقلعت همومى على أعتابك.
الله الشاهد إن أنا مامشتش في طريق هيكون أخره غيابك. 
خلينا نشوف مين الخسران، مين اللى اتساب!

مين اللى استني، و مين خاين مين الكداب!
أنا عارف إن احنا بنطلع وحشين دايما أنا عارف ده.
رضوي الشربيني ما بتسميش على صنف الرجالة القلاب. 
طب تعرفي ليه، تعرفي ليه؟ 

علشان من الصعب إن الراجل يحكي عن الست اللى تسيبه. 
ورجولته بتنقح على قلبه، و يخاف لا الناس تيجي تعيبه. 
فيألف هو قصص و أفلام عن إنه السايب و الغايب.

وإنها هتموت و أرجع يا ولاد، و عنيه بتكدب ألاعيبه.
مش بس الستات بتعيط، فيه بنات عوروا رجالة كتير.
بس كان الفرق في إن احنا منحبش نحكي عن الفواتير.
ندفع أتمان أوجاع تقتل، و نقوم الصبح و نشرب شاي.
ال اه عندنا عيب متتقالش؛ فنبان في القصة إحنا الدبابير. 
على أيُه حال الله يحنن.

و مسامح في الحق و راضي.
أيام و شهور، و شعور و حياه، و عيال أساميهم على الفاضي. 
ضيعنا سنين فمجتش في دي، أنا رديت بس اما غلطتي. 
وزمان عديتلك حزن كتير؛ فهعدي كمان المرادي.

و عجبي.

لمشاهدة قصيدة ليلى الاصلية اضغط هنا.